ذكرى اللعب في تصوير فيلم لعبة !

AGAME_POSTERهو مشروع تخرجي من معهد السينما في القاهرة

اقتباس من القصة القصيرة ” لنلعب لعبة ” للكاتب الإيطالي ألبرتو مورافيا .

الفيلم اتصور في استديوهات معهد السينما في وقت ما من شهر مايو – يونيه ٢٠٠٩

تمثيل ليلى سامي في دور الأم و روفينا عزت في دور الابنة

ليلى إعجابي بيها كان من مشاهدتي للفيلم القصير ” الأسانسير” اللي كانت بطلته و لما شفتها بالصدفة في شارع المعهد اتبسط انه اتعرفت عليها و عرضت عليها اخيرا القصة و كان رد فعلها :

” يا مروي ده قاسي جدا .. فرديت بكل عفوية سليم – ابنها – مش هيعمل زي البنت في القصة “

?????????

الفيلم تقريبا اخد ٦ شهور عمل

٣ شهور بحث و خناقات و حلول و ترتيب

شهرين ما بعد التصوير

شهر ديكور و بروفات و ٤٠ ساعة تصوير في يومين مكثفين جدا

طبعا كل الفترة دي في ناس كتير ساعدتني منهم الطلبة اللي كان مشروع تخرجهم برضه و كان تمرين شاق للكل

مدير التصوير وليد جابر ، مونتاج رضوى عزت، مهندسة ديكور هند سامي

مهندس صوت شريف زين، موسيقي تصويرية ابراهيم شامل

vlcsnap-2015-10-27-22h07m50s65

و منهم ناس اتورطت في الفيلم عشان يتعمل  !

من اهم ذكريات الفيلم ده، عائلة روفينا عزت و الممثل و مدرب التمثيل محمود إمام و الوقت اللي قضيناه معاها عشان تحبنا و تقبلنا و تمثل معانا الفيلم .

طبعا روفينا لوحديها هي فيلم ، إني أشوفها في الشارع ٣ مرات في نفس اليوم و اقرر إنه هي البنت اللي أنا عايزاها لانه شفتها بتكلم مامتها بقوة و الأم بتسمع لها فعلا .. وده كانت اللقطة اللي بدور عليها

A Gameو المرة الثانية لما تعبت و احنا بنصور و قررت انها تمثل علينا انها مرضت و نوقف التصوير و بعد ساعه أو أكتر نرجع نكمل تصوير و اكتشف انا و محمود انه كنا على حق هي ممثلة خطيرة !

مرحلة سرقة الاكسسوارات و اجزاء من الديكور من بيت هند و من بيتي كانت مرحلة حرجة بالنسبة لأهالينا ، حتي لعبة سليم ابن ليلى كانت من ضمن مسروقات الاكسسوار

نادين صليب و تحملها ليا في وقت بكلم فيه دكاترة نفسيين و أمهات و أصدقاء و انا بكتب السيناريو و أهم يوم هو يوم شوتات التكيلا في بيسترو قبل التصوير بساعات و انا بغير في السيناريو و هي بتطمني إنه كله هيبقي تمام

خناقتي على غرفة كاملة في الديكور طلبت تتبني و في لحظة قررت انه مش هستعملها ، هنا هند كانت هي اللي في وش المدفع أنا كان عندي مشكلة على سيناريو الفيلم مع دكتور علي بدرخان : )

و أغلي لحظة على قلبي كانت و انا واقفة وسط البلاتوه و أمي داخلة عليا هي و اختي و مش مصدقة انه اليوم ده جه .. بعد كل الخناقات و المخاطرات و المناورات و الكذب .. و تقولي : كل دول شغالين معاكي ؟ و شوية كده تتفرج و بعدين تسال هو انتو هتخلصوا امتي؟

و هنا اضحك من قلبي .. احنا ما بنخلصش .. احنا بيتخلص علينا !

vlcsnap-2015-10-27-22h08m58s221الوحش مش هفتكره بس الجميل لازم يذكر و لازم يتقدر ، الفيلم اترجم للغات كتير و اتعرض في مهرجانات كتير و اخد جوايز كتيرو الناس حبته – مش كلهم طبعا

اللي شافه مشكور و اللي ما شافش الفيلم يشوفه عشان اشكره

في الحالتين أتمني دايما اكون قادره و محظوظة اعمل أفلام شبهي و شبه اللي مقتنعه بيه و تكون أفلام أحب اشوفها و على قد ما الموضوع صعب و مكلف و مجهد بتمني يكون مرضي و مش مستحيل و اعرف انه عشان أقدر اعمل فيلم لازم أقدر اعيش الأول.. و اعيش الحياة للآخر .. و اللي بحبه اكتر من الفيلم هو الشغف اللي بيطلع و ضربات قلبي اللي بتزيد و انا بفكر في فيلم و بحلم اني بصوره و بعرضه !

و في ذكري لعبة امتنان واجب لكل اللي ساعد و اللي دعم و اللي مدح و اللي انتقد واللي اذى و اللي عطل و اللي وقف في وش المركب الماشي

و هنا اذكر كلمة ما فهمتهاش الا متاخر و مش فاكره مين اللي قالها  :

” لما تكون بتعمل مشروع و تقرر انه مركب المشروع دي قايمه ، ما تشتغلش الا مع الناس اللي جاهزه تاخد المغامرة و تركب المركب فورا و اللي هيتردد او هيشكك في المركب او سرعته او جماله او قدرته ما تشتغلش معاه .. الفيلم بيتعمل بالخيال مش بالواقع “

عقبال ما احكيلكم في ذكرى فيلم اسبوع و يومين قريبا ! اللي فعلا في تشابهات كتير  ..  بين كواليس لعبة برضه و الحياة اكبر بكتير من الافلام بس الافلام تستاهل تاخد جزء غالي من الحياة برضه ، هيكون في وقت اعمل شوية من اللي في خيالي من أفلام؟ أظن آه

A Game - لعبةلمشاهدة لعبة :

https://vimeo.com/61461382

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s