جميل انه الواحد يقول هو بيحب مين
عشان في الغالب مش بحب اتكلم عن اللي ما بحبوش او ما بحترموش
انتهازا للفرصة حابه اقول انه الثلاث سيدات دول أثروا فيا زي ما دايما في حياتي في سيدات بتأثر فيا
دي كانت فترة التكوين .. اللي بيدايقني انهم بيتهاجموا اغلب الوقت و اللي بيفرحني انهم صامدين محدش فيهم رجع في كلامه 🙂
نبيلة عبيد
بحبلها كتير جدا من أفلامها و بحب لقائاتها جدا .. الفيديو الأخير اللي أعادت فيه الرقصة من فيلم – الراقصة و السياسي – فهمني انه في ناس بجد الحياة معموله ليهم ..
كنت في منتهى السعاده لما قابلتها في كم مهرجان و من كتر طاقتها و جمالها مقدرتش اسلم عليها و اقولها آني بعشقها
و ان بالنسبة لي السينما و الأفلام دي حاجه كبيرة فشخ … تمثيلها مش تمثيل و شخصيتها ما تتكررش
نوال السعداوي
جميلة و صادقة و علم صامد .. فيلسوفة و رغم كل الاتهامات و السخافات علمها مكمل !
كنت في منتهى السعاده لما سلمت عليها و قلتلها انا بحبك و انتي من الناس اللي خلوني افكر و اسأل
إيناس الدغيدي
بحبلها نص أفلامها و النص التاني لأ
بس بحبلها شخصيتها و قوتها و انها ما تغيرتش و ما تلونتش و فضلت مؤمنة باللي بتفكر فيه و متصالحة مع نفسها و ادتني أمل إنه بنت تكون مخرجة ! دي حاجه كبيره
قابلتها صدفة في مطار بيروت بس ملحقتش اقولها اني بحترمها و بقدرها جدا !
طاقة حب و امتنان واثقة إنه هتوصل
القاهرة مايو ٢٠١٥
